【我想做專家】如何入行成為專業攝影師？

提升攝影技術

影張相好似好簡單，但要影得好，就好講究構圖、取景角度、照明處理等攝影技巧，而且商業攝影、人像攝影、動態攝影等不同範疇亦有不同要求，並非有部相機就可以駕馭。要提升攝影技術，有啲人會選擇報讀坊間機構舉行嘅攝影課程，好似香港攝影協會、香港風景攝影學會、中大專業進修學院同YMCA專業書院等，都有開辦各種攝影課程。有啲人則覺得自己睇書上網鑽研再練習就足夠，但無論你選邊個方法都好，最緊要都係能夠提升你嘅攝影水平。

添購適合器材

雖然話你影得好唔好同器材並冇必然關係，不過做得專業攝影師，少不免要配備不同類型嘅攝影器材，先能夠應付平日嘅攝影工作需求。除咗一部中階單反相機外，你可能仲需要大光圈定焦鏡、超廣角鏡、遠攝鏡同三腳架等器材，預算隨時過萬。一開始時你唔需要刻意追求最新款、功能最多嘅型號，等你熟悉點樣運用唔同器材再添置都未遲。

製作個人作品集

想成為專業攝影師接Job賺錢，就唔可以日日等運到。平日多嘗試唔同範疇嘅攝影，譬如婚禮攝影、運動攝影或風景攝影等練習，從過去嘅作品中選出唔同題材同類型嘅照片，去製作你嘅個人作品集，以展示你嘅攝影水平，有利向客人推銷自己。客人見你拍出大量優秀作品，就自然更放心僱用你。當然，梗係要開番個Facebook Page同Instagram，去推廣一下自己啦！

建立人際網絡

唔好以為專業攝影師淨係識影相就夠，想工作長做長有，就必須建立自己嘅人際網絡。譬如你嘅專長係婚禮攝影，你可以積極同婚禮策劃、婚紗租借等公司聯絡，爭取工作機會。你亦可以建立個人網站或製作名片宣傳，讓更多人認識你。唔少人都會通過熟人推薦聘用攝影師，所以你亦應該多同客人溝通，了解客人需要，滿足到客人要求，就自然樂意介紹更多客人俾你識。

由攝影師助手做起

有得揀大家梗係想一開始就做攝影師，不過專業攝影師需要大量資金去經營自己嘅Studio，包括投資器材、影樓租金同燈油火蠟等開支，風險並非人人能承受。所以有啲人會喺讀完攝影課程後擔任攝影師助手，一來可以從專家身上學嘢，二來可以藉此了解攝影行業嘅營運模式，睇下自己適唔適合呢行。雖然人工唔太高，但就勝在定時定候有糧出，又可以從學習同實戰，不失為一個入行嘅好途徑。

想學攝影？搵Toby 幫手啦！

希望以上嘅資訊可以令你更了解攝影行業。踏上攝影之路雖然一啲唔容易，但能夠影出一輯自己同客人都好滿意嘅相片，相信係唔少攝影師繼續堅持落去嘅動力！如果你都想做足準備，學習更專業全面嘅攝影技巧，Toby 平台上嘅攝影課程絕對幫到你！

Toby 平台能夠為你選擇最適合你嘅攝影課程，只需簡單三步，就能夠搵到啱心水嘅導師同課程提升攝影技術，助你成為專業攝影師！