【婚紗相靚景指南】香港10大婚紗攝影熱門景點

山頂公園除咗可以俯瞰全港景色外，仲有小山丘、水池同一大片綠油油嘅草地，不過最受歡迎嘅景點一定係公園嘅維多利亞式涼亭，通花欄柵優雅之餘又有古典味道，係唔少準新人嘅必影景點！

獅子會自然教育中心有大量樹林同森林小徑，環境清幽，鳥語花香，最重要嘅係遊人少，就算想影耐啲都唔怕阻到人。

迪欣湖係全港最大嘅人造蓄水池，又有人造噴泉同以天然岩石建成嘅瀑布，再加上大片草地同大型植物園，影相可謂一絕！唯一要留意就假日較多遊人，要盡量就番時間。

啟德郵輪碼頭公園設有多片大草坪，又有水景花園同噴泉廣場等多個景點，仲可以睇埋維多利亞港美景。雖然假日時遊人較多，但就勝在碼頭附近有洗手間、商店食肆同停車場，無論係換衫定休息都相當方便。

中大不嬲都係影相熱點，除咗為人熟知嘅崇基校園未圓湖外，大學圖書館旁邊嘅水池同園形廣場，仲有聯合書院嘅青草地都係影婚紗相嘅理想地點。不過最特別嘅一定要數新亞書院嘅合一亭，設計源自於新亞創辦人錢穆先生所寫嘅〈天人合一論〉，只要就啱角度就可以影到水天一色嘅景像，企埋去影相，望落真係好似同大自然融為一體咁！

白鷺湖互動中心嘅湖畔景色再配上充滿南歐風情嘅建築物，環境又靚又優雅。中心仲設有小艇租借服務，準新人可以坐住小船拍婚照，如果配埋日落景色就更有情調！

挪亞方舟大家可能去得多，但你又知唔知原來旁邊嘅馬灣公園有好多景點適合影婚紗相呢？彩虹瀑布同彩虹牆都係園內嘅特色景點，而意中園就係建有古典大鐘閘同花亭銅鐘嘅歐陸式花園，好多新人都鍾意喺花環拱門度影相，喻意共同走過人生路，零舍浪漫。至於位於園內最高處嘅鳥望台更可以睇到青馬大穚，無論係黃昏定夜景都一樣咁靚。

如果想拍一輯中式傳統婚照，咁荔枝角公園就係理想嘅攝影地點。成個公園以傳統嶺南風格打造，公園中央有個大水池，四周有橋梁、迴廊、亭台樓閣等建築，仲有人造山石砌成嘅山水景，喺度影婚照古典又有韻味！

南生圍有大片野生草原、紅樹林、水田同濕地等大自然景色，仲有橫水渡同長木穚等，啱晒想走原始、清新路線嘅準新人，而且平日遊人唔太多，拍婚照就更自由。

城門水塘不但係一家大細郊遊好去處，而且仲係影婚紗相嘅熱門景點，其中白千層林就係最有代表性嘅景點嘞！水位高時仲可以拍到水浸白千層嘅獨等景色添！郊野公園內仲有密密麻麻嘅樹林，又可以欣賞到美麗嘅水塘景色同石澗，咁多靚景都夠晒你影成日啦！