【情侶好去處】Chill住野餐 4個必去海濱長廊

香港最出名嘅景點一定係維港，唔少遊客嚟香港旅行嘅原因之一就係為咗睇維港及兩岸嘅景色。有呢個得天獨厚嘅優勢，喺兩岸嘅海岸線有唔少海濱長廊，最啱假日同另一半去踏下單車chill下！

中西區海濱長廊

呢度四個碼頭以唔同主題而設計嘅露天悠憩區域，一號碼頭係以海事為主題嘅兒童遊樂區；二號碼頭以「海中心公園」為設計理念，同時亦係一個垂釣區；三號碼頭鋪上一大片人造草地，最啱坐低休息一下；四號碼頭則為臨海設施，行到最近海嘅地方回望成條海濱長廊。

(圖片擷取自：ohpama)

鐘意影相打卡嘅你梗係唔可以錯過隔離，被籲為Instagram Pier嘅西環碼頭啦！喺呢度就最啱影番幾幅情侶相，post IG 呃下like啦！留意去影相嘅時候，正確地點係「中西區海濱長廊 —西區副食品批發市場段」，唔好阻礙西環碼頭運作啊！

(圖片擷取自：mindool_822@instagram)

前往方法：

1）香港大學港鐵站B2出口，步行約10-15分鐘

2）乘坐電車於屈地站或石塘咀總站下車，步行約10分鐘

西九海濱長廊

雖然西九海濱長廊仲有好多文化設施尚未興建好，但係海濱長廊同苗圃公園已經提供咗寬闊嘅休憩空間。假日嚟呢度野餐，欣賞一下維港對岸嘅風景，簡簡單單同另一半悠閒地度過週未都係一個唔錯嘅選擇。

(圖片擷取自：our harbour front)

苗圃公園係西九文化區內一個植物公園，種植超過一百種㖩自本地及外地唔同品種嘅植物，啱哂平時成日對住電腦手機嘅你，嚟放鬆一下。公園更會定時舉辦導賞團，有興趣參加嘅記得要預先預約啊！

(圖片擷取自：westkowloon.hk)

前往方法：

柯士甸站D2出口，步行約15分鐘

尖沙咀海濱長廊

關閉咗幾年進行維修翻新工程嘅星光大道最近終於重開，變成尖沙咀海濱長廊嘅一部份。呢度新增咗唔少面向維港嘅座位，可以吹住海風放鬆一下。怕曬嘅亦有扇形涼亭幫你遮下太陽。

(圖片擷取自：wikipedia)

喺星光大道入口亦增設「美樂士多」，售賣各種香港懷舊小食、零食同飲品，啱哂嚟呢度過番個懷舊週未。

(圖片擷取自：carmenlovesbeautyblog)

前往方法：

尖沙咀站E出口

觀塘海濱花園

雖然觀塘海濱花園已建成多年，但係因為唔係位於遊客區，所以訪客並唔算多。唔鐘意人多嘅地方，嚟呢度就最啱啦！呢度又有海景又有草地，最適合野餐，休息一下。

(圖片擷取自：wikipedia)

而喺海濱花園嘅起點及終點，即係觀塘同牛頭角，分別有一座地標性嘅塔樓，配合音樂同燈光效果嘅噴霧水景裝置，喺夜晚嘅時侯望落特別浪漫有情調。

(圖片擷取自：kimfamilytravel)

前往方法：

1）觀塘站B3出口，步行約10分鐘

2）牛頭角站B6出口，步行約5分鐘